Сяргей Грахоўскі

RSS Feed

Палаюць гронкі, як рубіны...

Сярэдняя: 5 (3 галасоў)

Палаюць гронкі, як рубіны,
Трымціць галінка угары,
У снезе спелую рабіну
Апанавалі снегіры.

I сцежку нашага расстання
Пазамятала, як на грэх,
Але я веру, што растане
I гэты нечаканы снег,

Ці гэты, ці наступны вечар
Усыпле зорнае святло,
I будзе новая сустрэча,
Якой дагэтуль не было.

Сум па снезе

Сярэдняя: 4.5 (2 галасоў)

Зноў смала замярзае на зрэзе,
Пасівела зямля і, як бубен, гудзе,
I па снезе сумуе,
Сумуе па снезе:
Пачынаецца снежань, а снег не ідзе.

Змрок у вокны сляпіцаю лезе,
I калючыя зоркі туманіць зіма,
Рунь па снезе сумуе,
Сумуе па снезе —
Хутка студзень, а снегу няма і няма.

Іней шорсткай ігліцай блішчыць на жалезе,
Адзінокі снягір на бярозе знямеў.
Я па снезе сумую,
Сумую па снезе,
Па звычайнай, блакітнай і чыстай зіме.

Усе аўтары