Алена Руцкая

Так незвычайна падаў першы снег.
Няспешна апускаўся,
                                 урачыста.
Блакітнаваты,
                      асляпляльна чысты
I незваротны,
                      як імгненняў бег.

Ён падаў у рухомай цішыні,
Гучаў узнёслай музыкай аргана —
Хвалююча,
                 трывожна,
                                  раскавана
Сцяжынкі лёгка гукамі плылі.

Бязважка ападала чысціня
На слоту
              і асклізлую макрэчу, —
Ахвяравальна,
                       шчодра
                                    і адвечна,
Як у імя адноўленага дня.